اتوار کو کراچی سے راولپنڈی جانے والی ہزارہ ایکسپریس کی 8 بوگیاں نواب شاہ ضلع میں سرہڑی ریلوے اسٹیشن کے قریب پٹری سے اترنے سے 27 افراد جاں بحق اور 25 زخمی ہوگئے۔
نواب شاہ کے قریب حادثے کی اطلاع ملتے ہی پولیس، ریسکیو حکام کی ایمبولینسیں جائے وقوعہ پر پہنچ گئیں جبکہ ٹریک پر ٹرینوں کی آمدورفت فوری طور پر معطل کردی گئی۔
آس پاس کے دیہاتوں کے لوگ بھی موقع پر پہنچ گئے اور پھنسے ہوئے مسافروں کو بچانا شروع کر دیا۔ ریسکیو 1122 کے مطابق ابتدائی طور پر 20 مسافروں کو بچا کر پیپلز ہسپتال نوابشاہ منتقل کیا گیا۔
انگلش میں خبریں پڑھنے کے لیے یہاں کلک کریں
سندھ کے وزیر اطلاعات، ٹرانسپورٹ اور ماس ٹرانزٹ شرجیل انعام میمن نے کہا کہ واقعہ کی اطلاع ملتے ہی ضلع بے نظیر آباد کے مقامی اسپتال میں ایمرجنسی نافذ کردی گئی۔
میمن نے کہا کہ سندھ حکومت کی پوری مشینری کو جائے حادثہ پر متحرک کردیا گیا ہے، شدید زخمیوں کو کراچی منتقل کیا جائے گا۔
وزیر نے مزید کہا کہ سانگھڑ اور نواب شاہ سمیت تمام اضلاع کے ہسپتالوں کو الرٹ کر دیا گیا ہے۔
محکمہ صحت سندھ کے حکام نے ایکسپریس ٹریبیون کو تصدیق کی ہے کہ حادثے میں اب تک 27 مسافر جاں بحق جب کہ 25 شدید زخمی ہیں۔
دریں اثنا، پاکستان ریلوے پی آر کے ایک اہلکار نے بتایا کہ ٹرین صبح 8 بجے کراچی سے روانہ ہوئی اور حادثے کی وجوہات کی تحقیقات کی جا رہی ہیں۔
دوسری جانب کراچی میں پی آر کے ترجمان کا کہنا ہے کہ بریک لگانے میں تاخیر سے حادثے کی شدت میں اضافہ ہوا۔ انہوں نے مزید کہا کہ کم از کم آٹھ سے 10 بوگیاں پٹری سے اتر گئیں۔
انہوں نے کہا کہ متاثرہ بوگیوں کو مشینوں کے ذریعے چند گھنٹوں میں ٹریک سے اتار دیا جائے گا، انہوں نے مزید کہا کہ کراچی سے روانہ ہونے والی ٹرینوں کو تاخیر کا سامنا کرنا پڑ سکتا ہے۔
میڈیا نیوز کے مطابق ایک ہزار سے زائد مسافر سوار تھے۔
