لندن، انگلش آل راؤنڈر معین علی آسٹریلیا کے خلاف ایشز سے قبل ٹیسٹ کرکٹ میں واپسی پر غور کر رہے ہیں کیونکہ اسپنر جیک لیچ کمر کے نچلے حصے میں اسٹریس فریکچر کے باعث باہر ہو گئے ہیں۔
35 سالہ معین علی کے بارے میں دعویٰ کیا جاتا ہے کہ انگلینڈ کے کپتان بین اسٹوکس اور کوچ برینڈن میک کولم نے ٹیسٹ کرکٹ میں ممکنہ واپسی کے لیے رابطہ کیا تھا۔ معین علی نے ستمبر 2021 میں کھیل کے طویل ترین فارمیٹ سے ریٹائرمنٹ کا اعلان کیا تھا۔
برطانوی میڈیا کا کہنا ہے کہ معین علی جو چنئی سپر کنگز کے اسکواڈ کا حصہ تھے جس نے 2021 اور 2023 انڈین پریمیئر لیگ جیتی تھی، انہیں فیصلہ کرنے کے لیے کچھ وقت دیا گیا ہے۔
انگلش میں خبریں پڑھنے کے لیے یہاں کلک کریں
2014 میں اپنا ٹیسٹ ڈیبیو کرنے کے بعد 64 ٹیسٹ میچوں میں معین نے 28.29 کی اوسط سے 2,914 رنز بنائے اور اپنی آف اسپن بولنگ سے 195 وکٹیں حاصل کیں۔
انگلینڈ جیک لیچ کے متبادل کی تلاش میں ہے، جس کی چوٹ سیریز کی تیاری میں ان کے باؤلنگ ڈپارٹمنٹ کے لیے تازہ ترین دھچکا ہے، فاسٹ بولر جوفرا آرچر بھی کہنی کی چوٹ کی وجہ سے باہر ہو گئے ہیں۔
ایجبسٹن میں ایشز سیریز 16 جون سے شروع ہوگی۔
