کوئٹہ اور گردونواح میں زلزلے کے جھٹکے
صوبائی دارالحکومت کوئٹہ اور اس کے گردونواح میں ہفتے کو زلزلے کے جھٹکے محسوس کیے گئے جس کی شدت ریکٹر اسکیل پر 4.6 ریکارڈ کی گئی۔
صبح تقریباً 11:10 پر زلزلہ آیا، جس سے رہائشیوں کو اپنے گھر خالی کرنے اور کھلی جگہوں پر پناہ لینے پر مجبور ہونا پڑا۔
پاکستان کے محکمہ موسمیات (پی ایم ڈی) کے مطابق، زلزلے کے جھٹکے نہ صرف کوئٹہ بلکہ آس پاس کے علاقوں میں بھی محسوس کیے گئے۔ زلزلے کا مرکز افغانستان کے کوہ ہندوکش میں تھا۔
نیشنل سیسمک مانیٹرنگ سینٹر نے بتایا کہ زلزلہ 98 کلومیٹر کی گہرائی میں آیا۔
یہ بھی پڑھیں: کیا پاکستان کوبڑے زلزلے کا خطرہ ہے؟
بڑے پیمانے پر خوف و ہراس کے باوجود، حکام نے تصدیق کی کہ صوبائی دارالحکومت کے کسی بھی علاقے میں انسانی جانی یا مالی نقصان کی کوئی اطلاع نہیں ہے۔
تاہم کچھ رہائشیوں نے دعویٰ کیا کہ زلزلے کے باعث شہر کے مضافات میں کچھ کچے مکانوں میں دراڑیں پڑ گئیں۔
