آصف زرداری کو ایک دن کی حاضری سے استثنیٰ مل گیا۔
کراچی: بینکنگ کورٹ نے پاکستان پیپلز پارٹی پارلیمنٹیرین کے صدر آصف علی زرداری اور ان کی بہن فریال تالپور کو جعلی بینک اکاؤنٹس کیس میں حاضری سے استثنیٰ دے دیا۔
انگلش میں خبریں پڑھنے کے لیے یہاں کلک کریں
سینئر وکیل فاروق ایچ نائیک نے پیر کو اپنے مؤکلوں کی جانب سے عدالت میں درخواستیں دائر کیں، جس میں استدعا کی گئی کہ مسٹر زرداری اسلام آباد میں اپنی سیاسی مصروفیات کی وجہ سے عدالت میں پیش نہیں ہو سکے۔
محترمہ تالپور کے بارے میں وکیل نے عدالت کو بتایا کہ وہ بیمار ہیں۔
عدالت نے انہیں ایک دن کے لیے حاضری سے استثنیٰ دیتے ہوئے کیس کی سماعت 22 اپریل تک ملتوی کر دی۔
زرداری، محترمہ تالپور اور دیگر کو جعلی بینک اکاؤنٹس کھولنے اور اربوں روپے کی غیر قانونی لین دین کے لیے استعمال کرنے سے متعلق مقدمات کا سامنا ہے۔
یہ بھی پڑھیں: آصف زرداری کوجعلی بینک اکاؤنٹس کیس میں ریلیف مل گیا
سال 2018 میں سپریم کورٹ کی جانب سے بنائی گئی مشترکہ تحقیقاتی ٹیم (جے آئی ٹی) نے کم از کم 29 بینک اکاؤنٹس کو جعلی قرار دیا تھا اور اپنی رپورٹ میں دعویٰ کیا تھا کہ یہ 42 ارب روپے کی لانڈرنگ کے لیے استعمال کیے گئے تھے۔
عدالت عظمیٰ نے جنوری 2019 میں جے آئی ٹی کی رپورٹ اور جمع کیے گئے شواہد کو مزید تحقیقات کے لیے قومی احتساب بیورو (نیب) کو بھیج دیا تھا۔ تاہم بعد ازاں مقدمات کو مزید کارروائی کے لیے کراچی کی بینکنگ کورٹ میں منتقل کر دیا گیا۔
