سندھ کے عبوری وزیر داخلہ ریٹائرڈ بریگیڈیئر حارث نواز نے پیر کو کہا کہ حکام نے اب تک کراچی میں غیر قانونی طور پر مقیم 1,700 افغان شہریوں کو گرفتار کیا ہے۔
انہوں نے ویسٹ زون کے ڈپٹی انسپکٹر جنرل آف پولیس کے دفتر کے باہر میڈیا سے گفتگو میں کہا کہ سندھ میں رہنے والے تمام غیر قانونی افغان تارکین وطن کو ملک بدر کر دیا جائے گا۔
انگلش میں خبریں پڑھنے کے لیے یہاں کلک کریں
یہ پیشرفت ایک ہفتے کے بعد ہوئی ہے جب نگراں حکومت نے تمام غیر دستاویزی تارکین وطن بشمول افغان شہریوں کو 31 اکتوبر تک پاکستان چھوڑنے کا الٹی میٹم دیا تھا، بصورت دیگر قید اور ان کے متعلقہ ممالک کو جلاوطنی کا خطرہ ہے۔
یہ فیصلہ کیا گیا کہ سرحد کے آر پار نقل و حرکت پاسپورٹ اور ویزوں سے مشروط ہوگی، جب کہ الیکٹرانک افغان شناختی کارڈ (یا ای تذکرہ) صرف 31 اکتوبر تک قبول کیے جائیں گے۔
ڈیڈ لائن گزرنے کے بعد، حکام تارکین وطن یا پاکستانی شہریوں کے تعاون سے چلائے جانے والے غیر قانونی جائیدادوں اور کاروباروں کو نشانہ بنانے کے لیے آپریشن شروع کریں گے۔
حکومتی ڈیڈ لائن کے بعد ملک بھر میں غیر قانونی تارکینِ وطن بالخصوص افغان شہریوں کے خلاف کریک ڈاؤن شروع کر دیا گیا ہے۔
گزشتہ ہفتے سندھ ایپکس کمیٹی کے اجلاس میں نگراں وزیر اعلیٰ جسٹس ریٹائرڈ مقبول باقر اور چیف آف آرمی اسٹاف جنرل سید عاصم منیر نے شرکت کی تھی، جس میں بتایا گیا تھا کہ صوبے میں غیر قانونی افغان شہریوں کی رہائش گاہوں کی نشاندہی کی گئی ہے۔
صوبائی حکومت نے اجلاس کو بتایا کہ غیر قانونی غیر ملکیوں کی وطن واپسی سے متعلق وفاقی حکومت کی پالیسی پر عمل درآمد کے لیے ایک ایکشن پلان وزارت داخلہ کے ساتھ شیئر کر دیا گیا ہے۔
