لاہور میں ایک اور نوجوان جان کی بازی ہار گیا کیونکہ اسے ٹک ٹاک بنانا پسند تھا۔ آٹھ دن بعد لاش دریا ئے راوی سے نکال لی گئی۔
لاہور کا رہائشی 30 سالہ نوجوان عدنان مبینہ طور پر بارہ دری کے قریب اپنے دوستوں کے ساتھ ٹک ٹاک بنا رہا تھا کہ وہ غیر متوقع طور پر پھسل کر دریائے راوی میں جا گرا، جہاں وہ بعد میں گہرے پانی میں ڈوب گیا۔
انگلش میں خبریں پڑھنے کے لئے یہاں کلک کریں
اس حوالے سے بتایا جاتا ہے کہ صورتحال کا مشاہدہ کرنے کے بعد ریسکیو اداروں کو الرٹ کر دیا گیا جس کے بعد ریسکیو ادارے کے عملے نے پانی میں موجود عدنان کو تلاش کرنے کی سرتوڑ کوشش کی لیکن ناکام رہے۔
امدادی کارکنوں نے آٹھ روز بعد متوفی عدنان کی لاش گہرے پانی سے نکالی، جس کے بعد اسے پوسٹ مارٹم کے لیے اسپتال منتقل کردیا گیا ہے۔
مقتول 30 سالہ عدنان شاد باغ لاہور کا رہائشی تھا۔ پولیس اور فرانزک ٹیم نے اس حوالے سے شواہد بھی اکٹھے کر لیے ہیں۔
قتل اور حادثاتی موت کا تعین پولیس کے مطابق تفتیش کے بعد کیا جائے گا تاہم اس کے چار دوستوں سے تفتیش شروع کر دی گئی ہے۔
واضح رہے کہ ایسے متعدد مواقع آئے ہیں جن میں ٹک ٹاک بنانے کے شائقین ہلاک ہو چکے ہیں۔
